चमकते रहो! स्टायलिश लुक देणाऱ्या सिक्विन पॅटर्नची तरुणींना भुरळ

Spread the love

तेजल निकाळजे, साठये कॉलेज
हट के आणि फॅशनेबल लुक करण्यासाठी सिक्वीनचा भन्नाट पर्यायाची निवड केली जात आहे. विशेष म्हणजे टोन्ड सिक्वीन पॅटर्नच्या वस्तू तरुणींना आकर्षित करत आहेत. सिक्वीनची छोटी डिझाइन असणाऱ्या वस्तूंना देखील तितकीच मागणी पाहायला मिळत आहे. रंगाचे असंख्य पर्याय, डिझाइन्स यामुळे सिक्वीन पॅटर्नच्या असंख्य वस्तू फॅशनप्रेमींचं लक्ष वेधून घेत आहेत. या पॅटर्नचे कोणते प्रकार ट्रेंडमध्ये आहेत, याविषयी…

कपड्यांची क्रेझ

तरुणींमध्ये सिक्वीन पॅटर्नची क्रेझ पाहायला मिळत आहे. कॅज्युअलपासून ते पार्टीवेअर कपड्यांपर्यंत सिक्वीन पॅटर्नला पसंती दिली जात आहे. कपड्यांवर कोणत्या पॅटर्नमध्ये चमक्यांचं डिझाइन केलं गेलंय यावर त्याची किंमत आणि मागणी अवलंबून असते, असं फॅशन डिझायनर सांगतात. तुमच्या आवडीप्रमाणे लहान-मोठ्या चमक्या निवडून स्टायलिंग करू शकता. कपड्यांमध्ये विशेषतः टू टोन्ड (दोन वेगळ्या रंगाच्या चमक्यांचा वापर केलेले) सिक्वीनची प्रचंड क्रेझ आहे. लहान मुलींसाठी देखील सिक्वीन पॅटर्नचे ड्रेस उपलब्ध असतात. सिक्वीन पॅटर्न खालील प्रकारच्या आऊटफिट्समध्ये पाहायला मिळतात…
– टॉप्स, टी-शर्टस, लाँग ड्रेस, श्रग, मिनी स्कर्ट, बॉडीकॉन ड्रेस, फिशटेल गाऊन, जम्पसूट, जॅकेट, पँट्स.

आकर्षक बॅग्स
कपड्यांसोबतच बॅगांमध्ये देखील सिक्वीन पॅटर्नला पसंती दिली जात आहे. अशा प्रकारच्या बॅग्स कॅज्युअल, पार्टी आणि सण समारंभांना हट के लूक आणण्यास मदत करतील. सिक्वीन पॅटर्नच्या बॅग्स आणि पर्स तरुणींपासून ते महिलांपर्यंत आवडीनं खरेदी केल्या जातात. महिलांमध्ये साडीवर मॅचिंग सिक्वीन पोटली बॅगेची फॅशन पाहायला मिळते तर तरुणींमध्ये युनिकॉर्न सिक्वीनची प्रचंड क्रेझ आहे. लहान मुलींच्या दप्तरातसुद्धा सिक्वीनचा वापर केला जातो. खालील पॅटर्नच्या सिक्वीन बॅग्सची सध्या चलती आहे.
– मोबाइल पाऊच, हँडबॅग, क्लच, बॅकपॅक, स्लिंग बॅग्स, वेस्ट बॅग्स, शोल्डर बॅग्स, टोट बॅग्स.
(तुम्हाला स्टायलिश बॅग वापरायला आवडतात का? जाणून घ्या हे पाच प्रकार)
साडी, ब्लाउज आणि बरंच काही!
साड्या आणि आकर्षक स्टेटमेंट ब्लाउज म्हणजे महिलांच्या जिव्हाळ्याचा विषय. सिक्वीन फॅशनमध्ये साड्या आणि ब्लाउजही मागे पडलेले नाही. विशेषतः पार्टीवेअर साड्यांमध्ये सिक्वीन पॅटर्नला पसंती दिली जाते. या पॅटर्नच्या साड्या सौंदर्याला चार चांद लावतात. यासोबतच सिक्वीनचे स्टेटमेंट ब्लाउज विकत घेण्याकडे महिलांचा कल जास्त असतो. एक स्टेटमेंट ब्लाउज अनेक साड्यांवर मॅच होऊ शकतो. शिवाय, घागऱ्यांवर खास सिक्वीन कापडाचा ब्लाउज शिवून घेण्याचा ट्रेंड पाहायला मिळतोय. सिक्वीन ब्लाउज आणि सॅटिन सिल्क व जाळीदार साडी यांचं कॉम्बिनेशन उत्तम दिसतं.
(जॅकेट्सचा स्टायलिश पर्याय, जाणून घ्या हे चार प्रकार)

चमचम सँडल्सना मागणी

पेहरावाला साजेशा सँडल किंवा शूजमुळे लूकमध्ये कमालीची भर पडते. सिक्वीन पॅटर्न थोडं भरजरी वाटत असलं तरीही विशिष्ट प्रकारच्या चपलांमध्ये सिक्वीन पॅटर्नला खूप पसंत केलं जातं. विशेषतः पारंपरिक पोशाखावर या पॅटर्नच्या चपला अधिक खुलून दिसतात. सोनेरी रंगाच्या सिक्वीनला मोठ्या प्रमाणात मागणी आहे. तसंच बाजारात सिक्वीन पॅटर्नमध्ये आकर्षक रंग व डिझाइन्स असणारे शूज आणि चपला उपलब्ध आहेत. शिवाय ऑनलाइन खरेदीचाही पर्याय निवडू शकता. खालील प्रकारच्या चपलांमध्ये सिक्वीन पॅटर्नला मागणी आहे.
– मोजडी, लोफर्स, नी-हाय बूट्स, स्नीकर्स, ओपन टो सँडल्स, शूज, कोल्हापुरी चप्पल, टी-स्ट्रॅप सँडल्स, हाय हिल्स, फ्लिप-फ्लॉप सँडल्स.
(Traditional Saree पाच प्रकारच्या सुंदर पारंपरिक साड्या)

अॅक्सेसरीज फॅशन
स्टायलिंग करताना आकर्षक आणि भन्नाट डिझाइन्सच्या अॅक्सेसरीजकडे दुर्लक्ष करून कसं चालेल…? अॅक्सेसरीजमध्ये सिक्वीन पॅटर्नची चलती पाहायला मिळत आहे. काही ठरावीक कपड्यांवर सिक्वीनच्या अॅक्सेसरीज शोभून दिसतात. लहान मुलींसाठी देखील सिक्वीन पॅटर्नमध्ये आकर्षक अॅक्सेसरीज सहजरित्या मिळतात. रंगसंगतीची योग्य जाण असणाऱ्या तरुणींसाठी सिक्वीन पॅटर्नच्या अॅक्सेसरीज उत्तम पर्याय आहे. खालील प्रकारच्या अॅक्सेसरीजमध्ये सिक्वीन पॅटर्नला पसंती मिळत आहे.
– कानातले, चोकर्स, हेअरबँड, बो, हेअर क्लिप्स, कंबरेचा पट्टा, टोपी, मोबाइल कव्हर.

टिप्स

– शिमर, सिक्वीन आणि मेटॅलिक कापड हे एकमेकांना पुरक पर्याय आहेत. तुमच्या पेहरावानुसार त्यांचा स्टायलिंगमध्ये समावेश करा.

– साडी सिक्वीनची असेल तर त्यावर सिक्वीन पॅटर्नचा ब्लाउज परिधान न करता प्लेन ब्लाउजची निवड करा.

– सिक्वीन पॅटर्नच्या कपड्यांवर अॅक्सेसरीज घालण्याची विशेष गरज नसते. एखादं नाजूक वेस्टर्न कानातलं देखील भन्नाट लूक आणेल. नेकपीसची निवड करताना गळ्याचा आकार, पेहरावाचा रंग या बाबी लक्षात असू द्या.

– जुन्या बुटांना नवा लूक देण्याचा विचार करत असाल तर सिक्वीन उत्तम पर्याय आहे.

– चमकणाऱ्या सिक्वीनची आवड नसणाऱ्या तरुणींसाठी पॅचवर्क असणाऱ्या कपड्यांचा पर्याय आहे.


Source link

You may also like...

Leave a Reply

Your email address will not be published. Required fields are marked *