डान्स करा, ताण विसरा! शफल डान्स व हुपिंगचे ‘हे’ आहेत फायदे

Spread the love

मुंबई टाइम्स टीम
कित्येकांनी ताणतणाव दूर करण्यासाठी नृत्याची मदत घेतली. घरात हसतं-खेळतं वातावरण राहण्यासाठी नृत्याचा फायदा झाल्याचं ते सांगतात. सध्या डान्स वर्कआऊट दिनचर्येचा एक महत्त्वाचा भाग झालाय. झुम्बा किंवा बॉलिवूड डान्स यांचा समावेश व्यायामात करणं हे आपल्यासाठी नवीन नाही. गेले काही महिने लोकांचा शारीरिक तंदुरुस्तीकडे कल वाढत चाललेला आहे. शिवाय, नवनवीन नृत्याचे व्यायामप्रकार शोधण्यासाठी लोक सोशल मीडियाची मदत घेत आहेत. लॉकडाउन दरम्यान सोशल मीडियावर शफल डान्स आणि हुपिंग हे नृत्यप्रकार प्रचंड व्हायरल झाले.

शफल डान्सची चर्चा
लॉकडाउनच्या काळात स्वतःचं मनोरंजन करण्यासाठी अनेकांनी सोशल मीडियाचा आधार घेतला. या दरम्यान सोशल मीडियावर बऱ्याच चॅलेंजेसचा पूर आला होता. जगभरातील लोकांकडून चॅलेंजना भरभरून प्रतिसाद मिळाला. विशेषतः स्टेअर शफल चॅलेंज भरपूर व्हायरल झालं. दिसायला थोडं कठीण वाटलं तरीही कित्येक मंडळींनी ते स्वीकारलं. हा नृत्यप्रकार मूळचा ऑस्ट्रेलियातील असून याला मेलबर्न शफल असंही म्हटलं जातं. जगभरातील इडीएम फेस्टिव्हल्समध्ये केल्या जाणाऱ्या डान्सचं चॅलेंज स्वीकारून मनोरंजन झाल्याचं बरेच जण सांगतात. शफल डान्स शिकण्यासाठी युट्यूबची मदत घेतली गेली. शफल डान्स चॅलेंजनं नृत्य न येणाऱ्या लोकांनाही थिरकायला लावलं. शफल डान्स केवळ मनोरंजनासोबतच कॅलरीज घटवण्यासाठीसुद्धा मदत करतं. शफल डान्समुळे हात आणि पायाचा उत्तम व्यायाम होतो आणि स्नायूंना बळकटी येते, असं तज्ज्ञ सांगतात. शफल डान्समुळे दर तासाला ५०० ते १५०० कॅलरीज आरामात घटवू शकता.

कशी काळजी घ्याल?

– शफल डान्स करताना दुखापत होण्याची शक्यता नाकारता येत नाही यासाठी काही ठरावीक बाबी लक्षात असणं आवश्यक आहे.
– डान्स करण्याआधी त्याबद्दल माहिती घ्या, सराव करा आणि मगच प्रात्यक्षिकाकडे वळा.
– शफल डान्सचा सराव करताना मोजे आणि स्पोर्ट शूज घालायला विसरू नका.
– सुरुवातीला गुळगुळीत पृष्ठभागाची निवड करा. एकदा सवय झाली की, तुम्ही कोणत्याही प्रकारच्या पृष्ठभागावर शफल डान्स करू शकता.
वरील व्यायाम करण्याआधी तज्ज्ञांचा सल्ला घ्या.
(आठवड्यातून दोनदा सैंधव मिठाने आंघोळ करण्याचे फायदे, मिळतील हे तीन लाभ)
हूपिंग चॅलेंज
सध्या तरुण मंडळी हूपिंगकडे आकर्षित होत आहेत. गेल्या काही महिन्यांमध्ये हूपिंग चॅलेंजची चर्चा पाहायला मिळाली. त्यासाठी कोणत्याही महागड्या उपकरणांची आवश्यकता नसते. हूपिंगसाठी लागणारी लवचीकता प्राप्त करण्यासाठी सराव हा एकमेव मार्ग असल्याचं तज्ज्ञ नमूद करतात. हूपिंग हा एक खेळण्याचा प्रकार असल्यामुळे शरीराची हालचाल होण्यासही मदत मिळते. यासाठी सर्वात आधी एक हूप आणि सुटसुटीत कपड्यांची निवड करा. हूपचा आकार तुमच्या सोयीनुसार निवडावा. सुरुवातीला ३६ इंचाची हूप रिंग खरेदी करण्याचा सल्ला तज्ज्ञ देतात. बाजारात ३० ते ४२ इंचाच्या हूपिंग रिंग्स उपलब्ध असतात. तुमच्या आवडीप्रमाणे विकत घ्या. हूपिंग करताना पायात ठरावीक प्रकारच्या चपला घालण्याचा नियम नाही. लॉकडाउनमध्ये अनेकांनी हूपिंग व्हिडीओज सोशल मीडियावर शेअर केले आणि मित्रमंडळींना चॅलेंजही दिलं. सुरुवातीचे काही आठवडे सराव करताना अडथळे येऊ शकतात.
(शरीर फिट ठेवायचंय? प्या १ ग्लास तुळस व ओव्याचं पाणी, जाणून घ्या लाभ)
फायदे अनेक

हूपिंग चॅलेंजचा अनेकांना फायदा झाल्याचं समोर आलंय. एका संशोधनाअंती असं सिद्ध झालं आहे की, हूपिंग केल्यानं दर तासाला ४०० कॅलरीज घटू शकतात. हूपिंगमुळे कंबर, मान आणि पाठीचा व्यायाम होतो. शरीराचा तोल सांभाळण्यासाठी आणि लवचीकतेसाठी या व्यायामाची निवड करण्यात येते.
(रात्री गाढ झोप मिळण्यासाठी लक्षात ठेवा या ७ गोष्टी)
कसं कराल?

– हूपिंग करण्यासाठी सर्वात आधी ताठ उभं राहा. दोन्ही पायात योग्य अंतर ठेवा.
– पाठ ताठ असावी. हूपिंग रिंगला दोन्ही हातात धरा. रिंग कंबर आणि पाठीच्या साहाय्यानं फिरवण्याचा प्रयत्न करा.
– फिटनेसप्रेमी वजन असणाऱ्या हूपिंग रिंगला पसंती देतात. यासोबतच हूपिंग स्क्वॅट्स आणि हूपिंग लंजेस या व्यायामांचंसुद्धा महत्त्व वाढतंय.
वरील व्यायाम तज्ज्ञांच्या देखरेखीखाली करा.

संकलन- तेजल निकाळजे, साठये कॉलेज


Source link

You may also like...

Leave a Reply

Your email address will not be published. Required fields are marked *