Diwali 2020 खरेदीसाठी घराबाहेर पडताय? अशी घ्या स्वतःची काळजी

Spread the love

प्रथमेश गायकवाड, विल्सन कॉलेज
सध्या सणासुदीचा (Diwali 2020) माहोल असून अनेकांची खरेदीची लगबग सुरू झाली आहे. करोनामुळे यंदाची दिवाळी सुरक्षित वावराच्या नियमांचं पालन करुन साजरी करावी लागणार आहे. सध्या आपल्या देशात करोना रुग्णांची संख्या कमी होत असली तरी काळजी घेणं आवश्यक आहे. युरोपमधील काही देशांत करोनाची दुसरी लाट आली असून आपल्या देशातही अशा प्रकारची लाट येऊ शकते, असं मत तज्ज्ञ व्यक्त करत आहेत. यामुळे विशेष काळजी घेऊन सण साजरा करणं फायद्याचं ठरेल. दिवाळीच्या खरेदीसाठी बाहेर जाताना आरोग्यविषयक काळजी कशी घ्यावी, हे जाणून घेऊ या.

मास्क आणि सॅनिटायझर
खरेदीसाठी बाहेर जाताना मास्क परिधान करणं आवश्यक आहे. तसंच सोबत स्वतःचं सॅनिटायझर असणं महत्त्वाचं आहे. करोनाचा संसर्ग श्वासोच्छ्वास करताना, खोकताना, शिंकताना आणि बोलताना तोंडावाटे किंवा नाकावाटे बाहेर पडणाऱ्या थेंबांमुळे होतो. यामुळे मास्क खूप महत्त्वाचे असून शिंक आल्यास सोबत एक रुमालही ठेवण्याचा सल्ला तज्ज्ञ देतात. याचबरोबर खरेदीसाठी जाताना कपड्यांच्या दुकानात प्रवेश करताना दरवाज्याला हात लावून झाल्यावर सॅनिटायझरनं हात स्वच्छ करावे. खरेदीसाठी गेलेल्या दुकानातील सॅनिटायझर न वापरता स्वतःचं सॅनिटायझर वापरावं. बऱ्याचदा दुकानातील सॅनिटायझरच्या बाटलीला अनेकांनी स्पर्श केला असतो. त्यामुळे संसर्गाचा धोका अधिक असतो.

काळजी घ्या

कपडे खरेदी करताना शक्यतो कपडे घालू बघण्याचं टाळा. यामुळे संसर्ग टाळता येईल. शक्यतो बॉक्समध्ये बंद असलेले कपडे घ्या, असा सल्ला तज्ज्ञ देतात. कपडे बघताना मास्क परिधान करा. विक्रेता आणि तुमच्यामध्ये सुरक्षित अंतर राखा. गर्दी असणाऱ्या दालनात जाऊ नका. त्याऐवजी एक दिवस आधी विक्रेत्याशी बोलून कमी गर्दी असलेल्या वेळेत जा. दालनात गेल्यावरही गर्दी असल्यास बसण्याची सोय केली असेल. तेव्हा सुरक्षित अंतर राखून बसा.
(Health Care करीना कपूरची न्युट्रिशनिस्ट ऋजुता दिवेकरकडून जाणून घ्या आवळा खाण्याचे फायदे)

प्रवास करताना…

खरेदीसाठी प्रवास करताना शक्यतो जमल्यास स्वतःच्या वाहनानेच प्रवास करा. टॅक्सीने प्रवास करणार असाल तर शेरिंग टॅक्सीने प्रवास करणं टाळा. टॅक्सीमध्ये सुरक्षिततेच्या दृष्टीने सर्वतोपरी काळजी घेतली गेली असल्याची खातरजमा करा. सणासुदीत ऐन गर्दीच्या काळात बसने प्रवास करणार असाल तर शक्यतो एक सीट सोडून बसा किंवा सुरक्षित अंतर ठेवून उभे राहा. बसमध्ये बऱ्याचदा गर्दी होते. अशा वेळी अजिबात मास्क काढू नका. वेळोवेळी सॅनिटायझरनं हात स्वच्छ करा.

विक्रेत्यांनीही घ्यावी काळजी
विक्रेत्यांनी विशेष काळजी घेणं आवश्यक आहे. दालनात ठिकठिकाणी टचलेस सॅनिटायझर मशिन्स, इलेक्ट्रॉनिक सॅनिटायझर मशिन्स उपलब्ध करून द्यावेत. दालनाचा दरवाजा, कॅश काउंटर ही सतत स्पर्श केली जाणारी ठिकाणं सॅनिटायझरने सतत स्वच्छ करावीत. दुकानातील गर्दी कमी करण्यासाठी आपल्या ग्राहकांना विशिष्ट वेळेत बोलवावं. आपल्या स्टाफचं तापमान, ऑक्सिजन रेट सतत तपासावा. त्यांनाही वैयक्तिक सॅनिटायझर उपलब्ध करून द्यावं. दालनातील शौचालयं स्वच्छ ठेवावीत, ग्राहकांना हात धुण्यासाठी सोय उपलब्ध करून द्यावी. तसंच ग्राहकांना टचलेस आणि कॅशलेस पेमेंटचे पर्याय उपलब्ध करून द्यावेत.
(सब्जाचे सेवन करण्याची योग्य वेळ आणि पद्धत, जाणून घ्या सविस्तर माहिती)

लहानमुलं आणि वयोवृद्ध मंडळी

यंदाची दिवाळी साजरी करताना संसर्गापासूनही बचाव करायचा आहे. यावर्षी खरेदीसाठी जाताना लहान मूल, वयोवृद्ध किंवा अस्थमासारखे आजार असणाऱ्या मंडळींना न नेण्याचा सल्ला तज्ज्ञ देतात. करोनाचा संसर्ग लहान मुलं आणि वयोवृद्धाना लवकर होतो. यामुळे याकाळात शक्यतो लहान मुलांना खरेदीसाठी बाहेर नेऊ नये. घरातील अशा मंडळींची खरेदी घरातील एकाच व्यक्तीनं जाऊन करावी किंवा ऑनलाइन खरेदी करावी. मुलांना बाहेर घेऊन जायची वेळ आल्यास पुरेपूर खबरदारी घ्यावी.

बाहेरचं खाणं टाळा
यंदा खरेदी करून झाल्यावर नेहमीप्रमाणे बाहेरच्या खाण्यावर ताव मारता येणार नाही. याकाळात बाहेर प्रचंड गर्दी होणार आहे, हे लक्षात असू द्या. गर्दीच्या काळात बाहेर खाणं धोक्याचं ठरेल. विविध नव्या नियमांसह हॉटेल्स सुरू झाले असले तरी गर्दीच्या काळात तिथे गेल्यास बाहेर वाट बघत गर्दीत उभं राहावं लागू शकतं. अशा वेळी स्वतःजवळ सुका खाऊ आणि पाण्याची बाटली ठेवण्याचा सल्ला तज्ज्ञ देतात. याचबरोबर बाहेरून मिठाई घेताना शक्यतो बॉक्समध्ये पॅक केलेल्या पदार्थांना प्राध्यान्य द्या.

बाहेरील वस्तू घरात घेताना…
खरेदी करून घरी आल्यानंतर आधी स्वतः हात-पाय स्वच्छ धुऊन घ्या. आणलेल्या वस्तूचे बॉक्स सॅनिटायझरने स्वच्छ करण्याचा सल्ला तज्ज्ञ देतात. कंदील, पणत्या अशा वस्तू स्वच्छ करण्यासाठी एका कापडावर सॅनिटायझर फवारुन त्याने पुसून घेऊ शकता. फराळाच्या पदार्थांची पाकिटं बाहेरून ओल्या कापडाने पुसून घ्या.

(कृति सेनॉनच्या फिटनेसचे ‘हे’ आहे सीक्रेट, जाणून घ्या तिचं वर्कआउट प्लान)
सणासुदीच्या दिवसात खरेदीसाठी बाहेर पडताना गर्दी करणं टाळा. मास्क आणि सॅनिटायझर याचा कटाक्षाने वापर करायलाच हवा. त्याच बरोबर सुरक्षित वावराच्या नियमांचं काटेकोरपणे पालन करायला हवं. सध्या सकाळच्या वेळी थोडा गारवा जाणवत असून दुपारी गरम होतं. वातावरणातील या बदलामुळेही सर्दी किंवा ताप येऊ शकतो. याकाळात लहान मूल, वृद्ध, अस्थमासारख्या आजार असणाऱ्या रुग्णांना घराबाहेर नेण्याचं टाळा. बाहेरून एखादी वस्तू घरी आणल्यास ते लगेच स्वच्छ करा. – डॉ. जयेश लेले, फिजिशिअन


Source link

You may also like...

Leave a Reply

Your email address will not be published. Required fields are marked *