Diwali 2020 चंदेरी साज! दिवाळीसाठी हटके लुक हवाय? जाणून घ्या ऑक्सिडाइज्ड ज्वेलरीचा ट्रेंड

Spread the love

तेजल निकाळजे, साठये कॉलेज
हल्ली ऑक्सिडाइज्ड दागिने (oxidised jewellery) तरुणींना आणि महिलांना भुरळ घालत आहेत. नेहमीपेक्षा हट के लुक आजमावून पाहायचा असेल तर ऑक्सिडाइज्ड दागिन्यांचा अत्यंत सुंदर पर्याय आहे. सणांसोबतच लग्नकार्यासाठी देखील या दागिन्यांना पसंती मिळत आहे. स्वस्त आणि मस्त अशी ओळख असणाऱ्या ऑक्सिडाइज्ड पॅटर्नमध्ये पारंपरिक महाराष्ट्रीय दागिने विशेष लक्ष वेधून घेत आहेत. असंख्य पर्याय आणि डिझाइन्स उपलब्ध असल्यामुळे ऑक्सिडाइज्ड दागिन्यांची फॅशन सध्या ट्रेंडमध्ये आहे.

नेकपीसची कमाल
ऑक्सिडाइज्ड दागिने कायम चर्चेत असतात. पण, पारंपरिक दागिन्यांमध्ये ऑक्सिडाइज्ड फॅशन विशेष आकर्षित करून घेत आहे. साडी, कुर्ते असो वा इंडो वेस्टर्न पेहराव असो…ऑक्सिडाइज्ड दागिने घातल्यानं लुकमध्ये कमालीची भर पडते. ऑक्सिडाइज्ड पॅटर्नमध्ये चोकर या प्रकाराची प्रचंड क्रेझ आहे. हे दागिने जितके ऑक्सिडाइज्ड होतात तितकेच आणखी आकर्षक दिसायला लागतात. बारीक घुंगरुंनी सजवलेले नेकपीस खूप सुंदर दिसतात. खालील दागिन्यांमध्ये ऑक्सिडाइज्ड पॅटर्नला मागणी आहे.
– ठुशी, कोल्हापुरी साज, गळसरी, वज्रटिक, धने माळ, गहू माळ, पोहे माळ, बोर माळ, ढोलक माळ, गजी पट्टी, अफगाणी किंवा बोहेमीयन नेकलेस, पुतळी हार, टेम्पल डिझाइनचा हार.


(प्रसिद्ध डिझाइनर तरुण तहिलियानीने लाँच केले ब्रायडल लेहंग्यांचे नवं कलेक्शन)
० कानातल्यांमुळे खुलेल लुक
ऑक्सिडाइज्ड दागिन्यांमध्ये कानातले हा प्रकार प्रचंड लोकप्रिय आहे. अगदी १०० ते १२०० रुपयांपर्यंत कानातले उपलब्ध असतात. यात ‘झुमका’ पॅटर्न तरुणींना कमालीची भुरळ घालतो. साडी असो वा इंडो वेस्टर्न फ्युजन पेहराव असो… ऑक्सिडाइज्ड झुमके घातल्यानं उठावदार लुक येतो. या कानातल्यांचं वैशिष्ट्य म्हणजे इतर कोणताही दागिना न घालता केवळ एक कानातलं तुमच्या लुकला चार चांद लावेल. ऑक्सिडाइज्ड दागिने दिसायला जड असले तरीही वजनानं हलके असतात.
– कानातल्यांमध्ये चांदबाली, कुडी, कनौती (चैन झुमका), अफगाणी/काश्मिरी झुमका, कान डिझाइन आणि प्रेसिंग बुगडीची क्रेझ आहे.


(मेटॅलिक लुक ठरतोय हिट! तरुणींमध्ये ‘या’ पॅटर्नची का आहे इतकी क्रेझ)
० नथ-बांगड्या दिसतील शोभून

ऑक्सिडाइज्ड दागिने कस्टमाइझ करून घेण्याची फॅशन सध्या ट्रेंडमध्ये आहे. नथ आणि बाजूबंद हे प्रकार कायम चर्चेत असतात. स्वतःचं नाव अंगठ्या आणि कानातल्यांमध्ये कोरून घेण्याची तरुणींमध्ये क्रेझ आहे. अशा प्रकारचे दागिने ऑनलाइन देखील मोठ्या प्रमाणात उपलब्ध आहेत. सध्या कुर्त्यांना ऑक्सिडाइज्ड बटणं लावण्याचा नवा ट्रेंड आला आहे. शिवाय, पायात घालण्यासाठी भरीव किंवा जाळीदार पॅटर्नचे अँकलेट्स उपलब्ध आहेत.
– नेकपीस आणि कानातल्यांसोबतच ऑक्सिडाइज्ड बांगड्या, हेअरपिन मंगळसूत्र, बिंदी, छल्ला, ब्रेसलेट्स अंगठ्या, पारंपरिक नथ, बाजूबंद आणि कंबरपट्टा यालादेखील तितकीच पसंती मिळते.


० जुन्याला नवा टच
लॉकडाउनमुळे ऑक्सिडाइज्ड दागिने बराच काळ वापरले गेले नसतील. अशा वेळी दागिने काळे पडल्यास काय करावं हा प्रश्न तुम्हाला नक्कीच पडला असेल. ज्वेलरी बॉक्समध्ये ठेवल्यानं दागिन्यांवर काळा थर आला असेल तर ते व्यवस्थितपणे स्वच्छ करा. स्वच्छ करण्यासाठी दागिन्यांना टूथपेस्ट किंवा टोमॅटो सॉस लावा आणि ब्रशच्या साहाय्यानं अलगद घासा. पाण्यानं स्वच्छ केल्यानंतर सुती कापडाने कोरडं करा. यामुळे दागिन्यांना नवी चकाकी येईल.

(चोकर्सची चलती! ट्रेंडनुसार निवडा स्टायलिश नेकलेस)

टिप्स
– ऑक्सिडाइज्ड दागिन्यांची खासियत म्हणजे हे दागिने भरपूर काळ टिकतात.
– रंगबेरंगी खडे, मणी, आरसा आणि हिऱ्यांच्या सजावटीमुळे हे दागिने आणखीन खुलून दिसतात.
– चंदेरी रंगाच्या दागिन्यांना सोनेरी आणि इतर रंगाच्या ऑक्सिडाइज्ड दागिन्यांचा उत्तम पर्याय आहे. काही दागिन्यांमध्ये चंदेरी आणि सोनेरी रंग एकत्र असतात जे दागिन्यांची शोभा वाढवतात.
– परफेक्ट लुक येण्यासाठी ऑक्सिडाइज्ड दागिने घालताना इतर सोन्याचे दागिने काढून ठेवावेत.




Source link

You may also like...

Leave a Reply

Your email address will not be published. Required fields are marked *