Diwali 2020 यंदा इंडोवेस्टर्न हिट! जाणून घ्या फॅशनमधील नवीन ट्रेंड

Spread the love

-बागेश्री पारनेरकर
‘रंग हे नवे नवे, दुनिया है नयी नयी’ असं सध्याच्या फॅशन जगताच वर्णन करता येईल. कारण प्रत्येक सण समारंभानुसार, कार्यक्रमांनुसार फॅशन ट्रेंड्स बदलत असतात. त्यामुळे दररोज बदलत जाणाऱ्या फॅशन तंत्रानुसार स्वतःला अपडेट ठेवणं ही काळाची गरज आहे. आपल्याकडे दिवाळी हा मोठा सण मानला जातो. म्हणूनच कपडे, दागिने, गॅजेट्स, इलेक्ट्रॉनिक वस्तू या सगळ्या खरेदीसाठी हा सुकाळ समजला जातो. फॅशनच्या बाबतीत बोलायचं झालं तर गेल्या काही वर्षांपासून दिवाळीत स्टायलिश, हटके लुक कसा करता येईल याकडे सगळ्यांचा कल वाढला आहे. गौरी गणपतीच्या काळात पारंपरिक लुकला प्राधान्य दिले जाते, तर दिवाळीच्या काळात एथनिक, इंडोवेस्टर्न लुकला पसंती दिली जाते. या दिवाळीत नेमके काय ट्रेंड्स आहेत ते जाणून घेऊ या.

स्त्रियांसाठी सगळ्यात आवडीचा, जवळचा पेहराव म्हणजे साडी. पारंपरिक, आधुनिक अशा दोन्ही लुकसाठी साडी हा एक उत्तम पर्याय आहे. हल्ली एखाद्या कार्यक्रमासाठी चांगला आऊटफिट नसेल तर तरुण मुलीसुद्धा साडीलाच पसंती देतात. पारंपरिक काठपदर, हेवी वर्क, एम्ब्रॉयडरी या साड्यांपेक्षा यंदा जॉर्जेट, गार्डन सिल्क, बनारसी सिल्क, कॉटन सिल्क, प्लेन साडी, कलमकारी, इरकल, खण साडी यांना अधिक मागणी आहे. हल्ली साडी नेसण्याच्या विविध पद्धतींची चलती आहे. यामुळे वेस्टर्न, एथनिक, इंडो वेस्टर्न, फ्युजन असे विविध लुक करता येतात. फ्युजन, इंडो वेस्टर्न लुकसाठी साडीच्या डिझाइनऐवजी ब्लाउजच्या डिझाइनमध्ये अनेक प्रयोग केले जातात. हल्ली रेडिमेड ब्लाउजला प्रचंड मागणी आहे. इरकल, खण, काठपदर, कॉटनच्या साड्यांवर हायनेक, ऑफ शोल्डर, कोल्ड शोल्डर, स्लीव्हलेस, बॅकलेस, थ्रीफोर्थ, रफल स्लीव्हज यामुळे फ्युजन लुक मिळतो. त्यातही कॉन्ट्रास्ट कलर, मिस मॅचची सध्या फॅशन आहे. त्यामुळे यंदाच्या दिवाळीत पारंपरिक साडीला आधुनिक टच दिला तर नक्कीच हटके आणि आकर्षक लुक मिळेल.
(Diwali 2020 चंदेरी साज! दिवाळीसाठी हटके लुक हवाय? जाणून घ्या ऑक्सिडाइज्ड ज्वेलरीचा ट्रेंड)

साडीबरोबरच कुर्ता-प्लाझो, कुर्ता-स्कर्ट, धोती पॅटर्न, फ्लोरल प्रिंटेड कुर्ता, सिगारेट पॅन्ट अँड लॉंग जॅकेट, वनपीस, क्रॉप टॉप-स्कर्ट या पॅटर्नला तरुण मुलींची पसंती आहे. असे अनेक ड्रेस रेडिमेड उपलब्ध आहेत. पण बऱ्याचदा आपल्याला हवी तशी फॅशन रेडिमेड ड्रेसमध्ये मिळत नाही. त्यामुळे यंदा जुन्या साडीचा किंवा कापड घेऊन आपल्याला हवा तसा ड्रेस शिवून घेण्याकडे मुलींचा कल वाढला आहे. याचा फायदा म्हणजे साडी जरी जुनी असली तरी एक नवाकोरा हटके ड्रेस तयार होतो. साडीच्या ड्रेसमध्ये शॉर्ट, लॉंग वनपीस, प्लाझो- कुर्ता, प्लाझो-क्रॉप टॉप आणि लॉंग जॅकेट हे ड्रेस अधिक ट्रेंडिंग आहेत. सध्या फॅशन जगतात विविध आकर्षक दुपट्टे लक्ष वेधून घेत आहेत.
(Fashion Tips को-ऑर्ड ड्रेसची क्रेझ! का वाढतेय या स्टायलिश पॅटर्नची मागणी?)

प्रिंटेड कॉटन दुपट्टे, प्रिंटेड नेट दुपट्टे, पारंपरिक शेला, प्लेन इरकल, खण दुपट्टा घेण्याकडे मुलींचा कल आहे. इंडो वेस्टर्न, फ्युजन ड्रेसवर कॉन्ट्रास्ट कलरचा दुपट्टा खूप उठून दिसतो. त्यातही लाँग वनपीस, प्लाझोवर हे नक्षीदार दुपट्टे अधिक खुलून दिसतात. यंदा बाजारात अनेक ड्रेसवर मॅचिंग मास्क उपलब्ध आहेत. हाच ट्रेंड ड्रेस शिवून घेताना दिसून येत आहे. अनेकजणी ड्रेस शिवताना मॅचिंग मास्क शिवून घेत आहेत. आकाशकंदिलातही खण, ब्रोकेड कापड, इरकल यांचा वापर दिसून येत आहे. थोडक्यात काय तर यंदाच्या दिवाळीत ‘पारंपरिकतेला आधुनिकतेचा टच’ ही थीम बघायला मिळत आहे.

दागिन्यांची न्यारी दुनिया
सौंदर्यात भर घालणारा एक महत्त्वाचा घटक म्हणजे ज्वेलरी. फॅशनच्या या दुनियेत दागिन्यांचेही अनेक ट्रेंड्स येत असतात. सध्या टेम्पल, प्रेशिअस, सेमी प्रेशिअस स्टोन्स, ऑक्सिडाइज ज्वेलरीची प्रचंड चलती आहे. मधल्या काळात ऑक्सिडाइज नेकलेस चर्चेत होते. पण आता ऑक्सिडाइज नथ, नोज पिन्स, बाजूबंद, इअररिंग्स, अंगठी, बिंदी, अँकलेट्स, बांगड्या असे सगळे दागिने बाजारात उपलब्ध आहेत. पारंपरिक साडीवर ऑक्सिडाइज ज्वेलरी खूपच उठून दिसते. इंडो वेस्टर्न, फ्युजन लुकसाठी ऑक्सिडाइज ज्वेलरी हा एक उत्तम पर्याय आहे. सध्या ऑक्सिडाइज नेकलेस, चोकर, ढोलकी नेकलेस, ठुशी, महाराष्ट्रीय साज, बारीक घुंगरांनी सजवलेले नेकपीस, झुमके यांना प्रचंड मागणी आहे. परंपरागत महाराष्ट्रीन दागिन्यांचा साज ऑक्सिडाइज रुपातही खूपच खुलून दिसत आहे. यावर्षी खणाचे दागिने हा नवीन प्रकारही बाजारात आलेला आहे. यंदाच्या दिवाळीत महिला वर्गाकडून पारंपरिक दागिन्यांऐवजी ऑक्सिडाइज, खण दागिने यांना विशेष मागणी आहे. हे दागिने कोणत्याही आऊटफिटवर उठून दिसतात. त्यामुळे हटके आणि आकर्षक लुकसाठी या दागिन्यांचा नक्कीच विचार केला पाहिजे.
(मेटॅलिक लुक ठरतोय हिट! तरुणींमध्ये ‘या’ पॅटर्नची का आहे इतकी क्रेझ)

जॅकेट्सची चलती

फॅशनच्या या दुनियेत आता पुरुषही मागे नाहीत. मुलींएवढी व्हरायटी मुलांच्या फॅशनमध्ये नसते. पण मुलांच्या बाबतीत आहे त्या फॅशनमध्ये नवनवीन प्रयोग मात्र नक्कीच करता येतात. सध्या पुरुषांच्या फॅशनमध्ये विविध जॅकेट्सची चलती आहे. शर्ट, कुर्ता या दोन्हीवर जॅकेट उठून दिसते. शॉर्ट कुर्ता आणि त्यावर नेहरू जॅकेट ही तर फॅशन आहेच पण सध्या प्रिंटेड फ्लोरल जॅकेट, मोदी जॅकेट, प्लेन जॅकेट घेण्याकडे कल वाढला आहे. इंडो वेस्टर्न, फ्युजन लुकसाठी जॅकेट हा एक उत्तम आणि उठावदार आऊटफिट आहे. मध्यंतरी एका मराठी मालिकेत नायकासाठी नायिकेच्या साडीला मॅचिंग असं साडीचं जॅकेट दाखवण्यात आलं होतं आणि त्यालाही खूप छान प्रतिसाद मिळाला. आता हा ट्रेंडही लवकरच बाजारात येईल. यावरून लक्षात येतं की साडीचा फक्त महिलांसाठी उपयोग होतो असं नाही, तर पुरुषांच्या फॅशनमध्येही साडीने प्रवेश केला आहे.


Source link

You may also like...

Leave a Reply

Your email address will not be published. Required fields are marked *