Diwali Skin Care दिवाळीसाठी आतापासूनच घ्या त्वचेची काळजी, कसे करावेत नैसर्गिक उपाय? जाणून घ्या

Spread the love

मुंबई टाइम्स टीम
दिवाळी अगदी काही दिवसांवर येऊन ठेपलीय. बऱ्याच लोकांनी यंदा ऑनलाइन खरेदीवर समाधान मानलं आहे. पण, त्वचेची काळजी कशी घ्यावी? हा प्रश्न अनुत्तरीतच राहतो. या दिवाळीत नेहमीप्रमाणे पार्लर किंवा सलूनमध्ये जाऊन स्किन ट्रीटमेंट करता येणं शक्य नाहीय. त्यात वर्क फ्रॉम होम आणि व्हर्च्युअल मीटिंग्जमुळे त्वचेसाठी पुरेसा वेळ देता येत नाहीय. अशा वेळी घरात उपलब्ध असलेल्या जिन्नसांचा त्वचेसाठी जास्तीत जास्त फायदा करून घ्या असं तज्ज्ञ सांगतात.

पौष्टिक खा
पौष्टिक आणि जीवनसत्वांनी भरपूर असणारा आहार शरीर आणि त्वचा दोहोंसाठी फायद्याचा आहे. पपई, टोमॅटो आणि कलिंगड यामुळे त्वचेला अनेक फायदे होतात. फळं आणि भाज्या खाल्ल्यानं त्वचेचा पोत सुधारण्यास मदत होते. शिवाय, केसांच्या आरोग्यासाठीही उत्तम ठरतं. टॅन किंवा सन बर्न झाल्यास हळद, मध आणि दूध यांचं एकत्रित मिश्रण करून फेस पॅक तयार करा आणि तो नियमित चेहऱ्यावर लावा.

​घरगुती उपाय करतील मदत

हिवाळ्यात त्वचेला जास्त जपावं लागतं. संत्र्याच्या सालाची पावडर चेहऱ्यावरील मुरुमं घालवण्यासाठी वापरली जाते. संत्र्याच्या सालांचा वापर करुन बनवलेली पावडर दह्यामध्ये मिक्स करून ती चेहऱ्यावर लावा. फेसपॅक धुतल्यानंतर जळजळ होत असल्यास गुलाब पाणी स्प्रे करा. संत्र्याला सौंदर्य प्रसाधनात भरपूर महत्त्व आहे. वरील फेसपॅक वर्षानुवर्षं तुमच्या त्वचेची निगा राखेल असं तज्ज्ञ सांगतात.

(Diwali Ubtan अभ्यंगस्नानासाठी घरच्या घरी तयार करा ४ प्रकारचे उटणे)

गुणकारी हळद

हळदीला आयुर्वेदात खूप महत्त्व आहे. चेहऱ्याच्या समस्यांना दूर ठेवण्यासाठी हळदयुक्त फेसपॅक तुमची मदत करतील. विशेषतः हिवाळ्यात चेहऱ्याला सुरकुत्या येण्याचं प्रमाण वाढतं. गुलाब पाण्यात केशर घालून ते हळद आणि डाळीच्या पिठात मिक्स करून चेहऱ्याला लावा. खासकरून हिवाळ्यात हे फेसपॅक मॉइश्चरायझर प्रमाणे काम करेल. टॅन घालवण्यासाठी हळदीचा उपयोग फायदेशीर ठरू शकतो.

(Skin Care Tips टिकली लावल्यामुळे होते स्किन अ‍ॅलर्जी, कोणते उपाय करावेत? जाणून घ्या)

​कोरफडीचे फायदेच फायदे

घरगुती फेसपॅक सुद्धा भरपूर गुणकारी असतात. हळद, गुलाबाच्या पाकळ्या, केशर मिश्रित दूध, संत्र्याच्या सालाची पावडर, गुलाब पाणी आणि कोरफडीचा गर एकत्रित करून फेसपॅक तयार करा. हळदीमध्ये मुरुमांना दूर करण्याची ताकद असते तर केशरामुळे त्वचा मुलायम आणि तजेलदार दिसायला मदत होते. त्वचेवरील अतिरिक्त छिद्र बंद करण्याचं काम संत्र्याची साल करतात. या फेसपॅकमुळे त्वचेला एकावेळी अनेक फायदे होतात.

(Diwali 2020 घरच्या घरी मेकअप करताना लक्षात ठेवा या टिप्स)

​रसायनांना करा बाय-बाय

चेहऱ्याची त्वचा अत्यंत नाजूक असते. रसायनं असलेल्या सौंदर्यप्रसाधनांचा वापर केल्यानं त्वचेची हानी होते. घरगुती फेसपॅकनं चेहऱ्याला कोणत्याही प्रकारचा त्रास होत नाही याउलट फायदाच होतो. दोन टेबलस्पून डाळीच्या पिठात चिमूटभर हळद आणि गुलाब पाणी घाला. ते चेहऱ्यावर लावा. दहा मिनिटांनी धुऊन टाका. डाळीचं पीठ हे उत्तम स्क्रब मानलं जातं. हे फेसपॅक चेहऱ्यावरील मृत त्वचा काढण्यासाठी मदत करतं. शिवाय, चेहरा स्वच्छ होऊन चेहऱ्यावर लकाकी येईल.

​त्वचा तजेलदार होण्यासाठी

मध, बेसन, टोमॅटोचा रस यांना एकत्र करून त्यात थोडा लिंबाचा रस घाला. या फेसपॅकमुळे चेहऱ्यावर ग्लो येतो. थंडीत त्वचेतील ओलावा कमी होतो. अशा वेळी त्वचेला जास्तीत जास्त मॉइश्चरायझर लावा. मध नैसर्गिक मॉइश्चरायझर असतं. यासोबतच दोन ते तीन चमचे तांदूळ आणि पाणी हे शिजवा. तांदळाचं मिश्रण चिकट झाल्यानंतर ते थंड करून संपूर्ण चेहऱ्याला लावा. तांदळाच्या पाण्यानं चेहऱ्यावर कमालीचा ग्लो येतो.

(Natural Skin Care गुलाब पाण्याने घरच्या घरी फेशिअल कसे करावे, जाणून घ्या योग्य पद्धत)

​सवय लावा

आरोग्यसोबत त्वचेची काळजी घेण्यासाठी तुमच्या दिनचर्येतील काही वेळ चेहऱ्यासाठी राखून ठेवा. केळं, कोरफड आणि गुलाब पाणी या फेसपॅकमुळे चेहऱ्याची त्वचा मऊ होण्यास मदत मिळेल. बऱ्याचदा चेहरा बाहेरून सुंदर असला तरीही त्वचेची आतून हानी झालेली असू शकते. चेहरा निरंतर तजेलदार आणि सुंदर राहण्यासाठी आतापासूनच त्याची काळजी घ्या. त्वचेचा पोत आणि चेहऱ्याची गरज ओळखून फेसपॅकची निवड करावी.

NOTE त्वचेशी संबंधित कोणतेही उपाय करण्यापूर्वी आपल्या ओळखीच्या डॉक्टरांचा सल्ला घ्यायला विसरू नका.

तांदळाच्या पाण्यापासून कसे तयार करावे स्किन सीरम? पाहा व्हिडीओ


Source link

You may also like...

Leave a Reply

Your email address will not be published. Required fields are marked *