Ganesh Chaturthi 2020 बाप्पाचा आवडता पदार्थ उकडीचे मोदक, जाणून घ्या याचे आरोग्यवर्धक फायदे

तांदळाचे पीठ

तांदळाचे पीठ आपल्या आरोग्यासह त्वचेसाठीही लाभदायक आहे. तांदळामध्ये फायबरचे प्रमाण जास्त आहे. फायबरमुळे आपल्या शरीरातील विषारी पदार्थ सहजरित्या बाहेर फेकले जाण्यास मदत मिळते. बद्धकोष्ठतेचा त्रास असल्यास तुम्ही तांदळाच्या पिठाचा आपल्या आहारामध्ये समावेश करू शकता. महत्त्वाचे म्हणजे तांदळामध्ये ग्लुटेन नावाचे प्रोटीन नसते. या घटकामुळे काही जणांना पचन प्रक्रियेशी संबंधित समस्येचा सामना करावा लागतो. या पिठामध्ये प्रोटीनचे प्रमाण सर्वाधिक असते.

(एगलेस चॉकलेट केक)

गूळ

गुळाच्या सेवनामुळे शरीराला भरपूर प्रमाणात व्हिटॅमिन आणि खनिजांचा पुरवठा होतो. आयुर्वेदिक आणि पारंपरिक औषधोपचारांमध्ये गुळाला विशेष महत्त्व आहे. लोहाचा (Iron) उत्तम स्त्रोत म्हणजे गूळ. जेवणानंतर थोडेसे गूळ खाल्ल्यास पचन प्रकियेशी संबंधित समस्या कमी होण्यास मदत मिळते. गुळातील औषधी गुणधर्मामुळे शरीराचे तापमान नियंत्रणात राहण्यासही मदत मिळते. गुळामुळे आपल्या त्वचेला भरपूर फायदे मिळतात. यातील पोषण घटकांमुळे आपल्या शरीरातील विषारी पदार्थ बाहेर फेकले जातात. ज्यामुळे त्वचेवर नैसर्गिक चमक येते. गुळाच्या सेवनामुळे आपल्या शरीराला ऊर्जा मिळते. दुधामुळे गूळ मिक्स करून प्यायल्यास शारीरिक थकवा, अशक्तपणा दूर होण्यास मदत मिळते.

(चविष्ट ब्रेड रसमलाई)

​वेलची पावडर

स्वयंपाकाची चव वाढवण्यासाठी वेलचीचा वापर केला जातो. एवढ्याशा वेलचीचे आरोग्यदायी लाभ देखील भरपूर आहेत. वेलचीमध्ये लोह, पोटॅशिअम, कॅल्शिअम, सल्फर आणि मॅग्नेशिअम यासारख्या खनिजांचा साठा आहे. तसंच यामध्ये अँटी सेप्टिक, अँटी ऑक्सिडेंट्स, भूक वाढवणारे गुणधर्मही आहेत. वेलचीमुळे गॅस, अपचन, पोट फुगणे यासारख्या समस्या कमी होतात. वजन कमी करण्यासाठी पोषक असलेल्या घटकांचाही वेलचीमध्ये समावेश आहे. सर्दी – खोकल्याचा त्रास कमी करण्यासाठी तुम्ही गरम पाणी किंवा दुधामध्ये वेलची पावडर मिक्स करून पिऊ शकता.

(खवा पेढा रेसिपी)

ओले ​खोबरे

मोदकामधील सर्वात महत्त्वाची सामग्री म्हणजे खोबरे. ओल्या नारळाच्या खोबऱ्यापासून मोदकाचे सारण तयार केलं जाते. ओल्या नारळाच्या खोबऱ्यामुळे जेवण पचण्यास मदत मिळते. यामध्ये अँटी व्हायरल, अँटी फंगल, अँटी बॅक्टेरिअल आणि अँटी पॅरासायटिक गुणधर्म आहेत. ओल्या नारळामुळे आपल्या शरीराला ऊर्जा मिळते. ओले खोबरे खाल्ल्यास आपल्याला वारंवार भूक लागत नाही. हाडे आणि दातांच्या आरोग्यासाठी नारळातील घटक पोषक आहेत. ओल्या खोबऱ्यामुळे आपल्या त्वचेमध्ये ओलावा टिकून राहण्यास मदत मिळते.

(गव्हाच्या पिठाचा चविष्ट शिरा)

​तूप

तुपाचे आरोग्यवर्धक तसंच सौंदर्यवर्धक लाभ देखील आहेत. योग्य प्रमाणात तुपाचे सेवन केल्यास पचन प्रक्रिया सुरळीत सुरू राहते. बद्धकोष्ठता (Constipation), मधुमेहाच्या (Diabetes) रुग्णांसाठी तुपाचे सेवन करणं फायदेशीर असते. तुपामध्ये व्हिटॅमिन ए, व्हिटॅमिन डी, व्हिटॅमिन ई आणि व्हिटॅमिन के आहे. हे घटक शरीराचे हाडे, मेंदू, हृदय आणि रोगप्रतिकारक क्षमतेसाठी पोषक आहेत. तुपामुळे देखील आपल्या शरीरातील हानिकारक पदार्थ बाहेर फेकले जातात. कोरड्या त्वचेसाठी तूप वरदान आहे.

(होममेड रसगुल्ला रेसिपी)

​सुकामेवा

काही जण आपापल्या आवडीनुसार मोदकाच्या पाककृतीमध्ये सुकामेव्याचा वापर करतात. सुकामेव्यामध्ये प्रथिने आणि तंतुमय पदार्थांचा साठा असतो. याद्वारे आपल्या शरीराला व्हिटॅमिन, खनिज यासारख्या पोषक तत्त्वांचा पुरवठा होतो.

दरम्यान, प्रत्येक गोष्टीचे फायदे आणि तोटे देखील असतात. त्यामुळे उकडीचे मोदक सुद्धा योग्य प्रमाणात खाल्ल्यास शरीरास अपाय होणार नाहीत.

Note पण यापैकी एखाद्या सामग्रीपासून तुम्हाला अ‍ॅलर्जी असल्यास डॉक्टरांचा सल्ला नक्की घ्यावा.

(दुधी भोपळ्याची पौष्टिक खीर)