Work From Home वर्क फ्रॉम होमचा कंटाळा आलाय? करा या ५ महत्त्वाच्या गोष्टी

Spread the love

मुंबई टाइम्स टीम
लॉकडाउन सुरू झाल्यापासून गेले अनेक महिने बरेचजण वर्क फ्रॉम होम करत आहेत. सुरुवातीच्या काळात अनेकांच्या पसंतीस उतरलेली ही संकल्पना आता मात्र काही जणांना अगदी नकोशी झाली आहे. वर्क फ्रॉम होममुळे शारीरिक आरोग्य, जीवनशैली, मानसिक संतुलन, कार्यक्षमता आणि वैयक्तिक जीवन यांच्यावर नकारात्मक परिणाम झाल्याच्या तक्रारी आता समोर येऊ लागल्या आहेत. या नव्या कार्यपद्धतीला अनेक जण कंटाळले आहेत. वर्क फ्रॉम होममुळे नक्की कोणत्या समस्यांना सामोरं जावं लागत आहे आणि त्यांच्यावर काय उपाययोजना करता येतील हे जाणून घेऊ या.

संवाद महत्त्वाचा
वर्क फ्रॉम होम करताना तुमच्या कामावर देखरेख ठेवणारं कोणीही नसतं. त्यामुळे तुमच्या कामातून तुम्ही नेमकं काय आऊटपूट देताय, यावरून तुमची कार्यक्षमता तपासली जाते. अनेकदा तुम्ही खूप मेहनत घेऊनसुद्धा तुमच्या टीमला तुमच्याकडून अपेक्षित असलेलं आऊटपूट तुम्ही देऊ शकत नाही. तेव्हा आपण कुठेतरी मागे पडत आहोत आणि ऑफिसमधील तुमच्या इमेजला धक्का पोहोचतो, असं वाटणं अगदी स्वाभाविक आहे. तसंच काहीवेळा डेडलाइन्स, टार्गेट्स पाळता न आल्याने त्याचा मानसिक ताणसुद्धा जाणवू शकतो. अशा वेळी तुमच्या टीमलीडरशी संवाद साधा. तुम्ही काम वेळेत पूर्ण का करू शकला नाहीत, याची कारणं प्रामाणिकपणे त्यांच्यापर्यंत पोहोचवा. तुमच्या प्रोजेक्टमधील अडथळे त्यांना सांगा. तसंच तुमच्या दैनंदिन कामाचा अभिप्राय त्यांच्यापर्यंत पोहोचेल, याची काळजी घ्या. काम करताना तुम्हाला आलेले चांगले आणि वाईट दोन्ही अनुभव त्यांच्याशी शेअर करा. तसंच मार्गदर्शनसुद्धा घ्या. जेणेकरून, तुमच्या कामाचे नियमित अपडेट्स त्यांना मिळत राहतील. अखेरीस तुम्ही त्या प्रोजेक्टसाठी केलेल्या कामाची यादी तयार करा. जेणेकरून, वेळ पडल्यास तुम्ही आत्मविश्वासानं ही कामांची सूची तुमच्या टीम लीडरसमोर मांडू शकाल.

नियमित मीटिंग फायद्याच्या
ऑफिसमध्ये काम करत असताना तुम्हाला काही समस्या येत असतील, तर सहकार्याची किंवा तुमच्या वरिष्ठांची मदत घेता. त्यामुळे तुमच्या शंकांचं निरसन होतं. वेळ पडलीच तर काही सहकाऱ्यांसोबत मीटिंग रुममध्ये एकत्र जमून व्हाइटबोर्डचा वापर करत त्या समस्येवर उपाय शोधून काढू शकता. चर्चा करून प्रश्न सोडवल्याने अनेक कंपन्यांमधील कर्मचारी उत्कृष्ट आऊटपूट देऊ शकतात, असं अभ्यासाअंती सिद्ध झालं आहे. पण, आता वर्क फ्रॉम होममुळे मीटिंगचं प्रमाण खूप कमी झालं आहे. त्यामुळे तुमची आणि तुमच्या टीमची कार्यक्षमता वाढवण्यासाठी प्रत्येकी दोन तासांच्या अंतराने तुमच्या टीम मेंबर्ससोबत मीटिंग आयोजित करणं योग्य ठरेल. त्यामुळे तुमच्या कामातील समस्या लवकरात लवकर दूर करणं तुम्हाला शक्य होईल.

परिणामकारकतेचा व्हावा विचार
वर्क फ्रॉम होममुळे सहकाऱ्यांसोबतचा प्रत्यक्ष संवाद कमी झाला असेल. ई-मेलवर संवाद साधत असलात, तरीही तो प्रत्यक्ष संवादासारखा परिणामकारक होत नाही. प्रत्यक्ष संवादामध्ये हावभाव आणि आवाजाचा चढ-उतार यांचा महत्त्वाचा वाटा असतो. त्यामुळे प्रत्यक्ष संवादाची परिणामकारकता वाढते. ई-मेलवरील संवादमध्ये या बाबी नसल्याने अनेकदा तुम्हाला अपेक्षित असलेला संदेश तुमच्या सहकाऱ्यापर्यंत पोहोचतच नाही. यावर उपाय म्हणजे तुम्ही तुमच्या लेखनाची शैली सुधारायला हवी. तुम्हाला नेमका काय संदेश पोहोचवायचा आहे, त्यामधील विविध मुद्यांची मांडणी तुम्ही कशी करायला हवी, तुमच्या सहकाऱ्याला तुमचा संदेश सहजपणे समजावा यासाठी तुमची भाषा कशी हवी याचा व्यवस्थित विचार करा. त्यानुसार मेल तयार करा. सुरुवातीला याबाबत तुमच्या सहकाऱ्यांकडून अभिप्रायसुद्धा घेऊ शकता.

वातावरणनिर्मिती करा
तुमच्या ऑफिसमधील वातावरण तुमची व्यावसायिक कार्यक्षमता वाढवण्याच्या दृष्टिकोनातून तयार केलेलं असतं. तसं तुमच्या घरातील वातावरण असेलच असं नाही. त्यामुळे तुमच्या घरातील वातावरणाचा तुमच्या व्यावसायिक कार्यक्षमतेवर वाईट परिणाम होत आहे, असं जर तुम्हाला वाटत असेल तर तुमच्या घराच्या वातावरणामध्ये तुम्ही काही बदल करु शकता. त्यासाठी टेबल नीटनेटकं ठेवा. तुमच्या ऑफिसमधील टेबलप्रमाणे त्याची रचना करता आली तर उत्तम! तुमच्या खोलीचा दरवाजा बंद ठेवा. काम करताना हेडफोनचा वापर करा. तुम्ही स्वत:ला काही नियम घालून घेऊ शकता. काम करताना सोशल मीडियाचे नोटिफिकेशन बंद ठेवणं हेसुद्धा फायदेशीर ठरु शकतं. अशाप्रकारे वातावरणनिर्मिती केल्यानं कार्यक्षमता वाढण्यास मदत होईल.

प्राधान्यक्रम निश्चित करा
वर्क फ्रॉम होम योग्य पद्धतीनं पार पाडण्यासाठी तुम्ही तुमच्या कामांचा प्राधान्यक्रम ठरवणं अत्यंत गरजेचं आहे. अन्यथा काम साठून ते पूर्ण करण्यासाठी कदाचित तुम्हाला वीकेंडलासुद्धा काम करावं लागू शकतं. कंपनीतील महत्त्वाच्या प्रोजेक्ट्सची कामं पूर्ण करा. रोज टप्प्याटप्प्याने काम पूर्ण करण्यावर भर द्या. काही क्रिएटीव्ह काम करायचं असल्यास त्यासाठी ठरावीक वेळ राखून ठेवा. ई-मेल आणि सोशल मीडिया अपडेट्स बघायला विसरु नका.

संकलन- राहुल पोखरकर, ए. पी. शाह इन्स्टिट्यूट ऑफ टेक्नॉलॉजी


Source link

You may also like...

Leave a Reply

Your email address will not be published. Required fields are marked *